(45)

أمام البوابة الرئيسية لأحد أشهر السجون في مصر وقفت الأم وقلبها يكاد يطير فرحاً فأخيراً سيستعيد ولدها حريته المسلوبة.

خرج وقد ضيق عينيه أمام ضوء الشمس القوي ، لقد اشتاق لرائحة الهواء النقي الذي لا تشوبه رائحة السجون المتعفنة.

اتجه إلى والدتها ما إن لمحها وألقى نفسه بين ذراعيها ، كم اشتاق لهذا الدفء الذي يشع من والدته ، لم يكن يعرف قيمته ولكنه الآن لا يقدر لديه بمال.

الأم: وحشتني أوي أوي يا محمد

محمد: وإنتي أكتر يا أمي

مسحت الأم دموع الفرحة قائلة بمرح: أما أنا عملالك جوزين حمام إنما إيه يستاهلوا بؤك

قبل يدها: ربنا يخليكي ليا وما يحرمنيش منك.

اتجه إلى الطريق الرئيسي لكن منعته أمه قائلة: رايح فين؟

أجابها مستغرباً: هاوقف تاكسي

أشارت إلى سيارة تقف على مسافة منهما: ماهي العربية موجوده أهي نركب تاكسي ليه ؟

سألها بتوجس: عربية مين دي ؟

الأم بفخر: عربية ديما صاحبة مريم بعتتها معايا بالسواق ، يا حبة عيني ما رضيتش أجي هنا لوحدي بتاكسي

جرته والدته جراً إلى السيارة ، وبعد أن استقرا بها سألها:

بس أنا ما عرفتش هما خرجوني ليه ؟

- مسكوا اللي عمل كدا والبواب بتاع العمارة اتعرف عليه وقال إنه هو دا فأنت كدا بقيت براءة.

أومأ صامتاً ، وبعد دقيقة: إحنا هنروح فين ؟

- هنروح بيتك يا حبيبي اللي كبرت فيه

ارتسمت إبتسامة باهتة على شفتيه ولم يعلق.

أضافت الأم مترددة: محمد ... أنا عايزه أقولك على حاجه بس خايفة تزعل

قبل محمد يدها قائلاً: أنا عمري ما أزعل منك أبدا يا أمي

ربتت على يده بحنان: تسلم يا ابني

محمد بمرح: ها كنتي عايزة تقولي إيه ؟

أشفقت على حال ولدها ولكنها قالت: نعمات اتجوزت

كأن دلواً من المياه البارده سُكب على رأسه: إيه ؟ من مين؟

أجابت بغيظ: المعلم حسونه الله يحرقه ! ... طلق واحدة من اللي كانوا على ذمته واتجوزها.

لم يرد ولم يعلق ، ظهر وجهه لا مبالياً بينما قلبه يحترق ، أليس هذا من وقف في طريق سعادة شقيقته من أجله وأليست تلك من قام بإهانة والدته لينال رضاها ، لقد سُجن بسببها وكرهته أخته لأجلها وكاد يفقد رضا والدته عليه ليرضي ذاتها.

إن ما يشعر به الآن أقل ما يستحق ، فهو من أخطأ وعليه تحمل العاقبة فلقد قال الله –تعالى- " ولا يظلم ربُك أحداً ".

هو الذي اختار ما فعله وبالتالي هو اختار عقابه ، كما قال الله –عز وجل- " وما ظلمناهم ولكن كانوا هم الظالمين ".

خافت الأم على ابنها ، قلقت أن يتهور فيعود من حيث أتى ولا يتمتع بحياته أو حريته فقالت بحنان: عايزاك تركز ف حياتك وبلاش جنان وتهور ، اللي فات مات خلينا نركز ف اللي جاي.

فهم محمد خوف والدته فابتسم: ما تخافش مش هاجي عندهم ، دا أصلاً ربنا رحمني منها وأهو ابتلاه

ضحكت الأم ، سألها: هي مريم لسه زعلانة مني؟

أومأت الأم بحزن: اللي شافته ماكانش قليل يا ابني

وافقها ثم قال: بكره هأروح أشوفها واعتذر منها ، لازم أصالحها.

جلس يردد الجملة الأخيرة مراراً وتكراراً على نفسه بينما تدعو والدته له بالصلاح والهداية وأن يتم نعمته عليه بالخير.

---------------

جلست ديما على مكتبها بالشركة ومعها مريم وباسل.

ديما: محمد خلاص خرج ؟

أومأت مريم: أه ، ماما لسه مكلماني بتقولي وصلوا ودخل يستحمى عشان يشيل ريحة السجن من عليه.

باسل: حمدالله على سلامته

مريم بنصف إبتسامة: الله يسلمك

ديما: وإنتي مش ناوية تصالحيه؟

مريم متنهده: اللي في الخير يقدمه ربنا

ديما محذرة: بلاش تظلميه زي ما ظلمك !

مريم بتعجب: أظلمه ؟

ديما: أيوه ، لما تبعدي عنه ف وقت هو محتاجك فيه يبقى بتظلميه ، لما تسحبي داعمك ليه ف أزمته يبقى بتظلميه

مريم بعصبية: ولما حرمني أتجوز اللي بأحبه دا مش ظلم ولما كان عايز يجوزني للمعلم زفت دا مش ظلم ؟ لما شغلني بالغصب عشان اصرف على تعليمي دا مش ظلم ؟ لما كنت بأنام كل يوم على علقه دا مش ظلم ؟؟ ولما بقيت ف الشارع لوحدي دا مش ظلم ؟؟؟

ديما بشفقة: أنا معاكي ف كل دا ، بس في حديث للرسول -صلّ الله عليه وسلم- قريته مرة وحبيته جدا " لا تكونوا إمعة ، تقولون : إن أحسن الناس أحسنا ، وإن ظلموا ظلمنا ، ولكن وَطِّنُوا أنفسكم، إن أحسن الناس أن تحسنوا ، وإن أساءوا فلا تظلموا ".

رددوا: عليه الصلاة والسلام

ديما بحزم: لو عايزة تبقي إمعة وعكس اللي قال الرسول عليه الصلاة والسلام فإنتي حره.

تنحنح باسل مغيراً محور الحديث: وأنتوا ناويين تفضلوا في الشقة دي كتير ؟

ديما متعجبة: أومال عايزنا نروح فين ؟

باسل: أي مكان تاني أمان أكتر من كدا

مريم: بس كريم قال إن في حرس على العمارة والشقة

باسل: أيوه تمام ، بس أنا في رأيي يا ترجعوا تعيشوا ف الفيلا بتاعت ديما يا الأحسن في رأيي تعيشوا مع بابا

ديما باستغراب: أعيش مع بابا مراد ؟ وليه كل دا ؟

باسل: عشان تأمين فيلا أسهل بكتير من تأمين شقة ف عمارة

ديما: ربنا يسهل ، هافكر وأقولك

باسل: أوكيه ، بس فكري بسرعة

مريم: أنتوا لسه ما تعرفوش حاجه عن نعيم ؟

باسل بغضب مكتوم: دا جحيم مش نعيم ، لسه مش لاقينله أثر عشان كدا عايز احطكم ف مكان أمن على قد ما أقدر.

ديما: قل لن يصيبنا إلا ما كتب الله لنا.

------------

رُفع المنديل الأبيض ودعا المأذون: بارك الله لكما وبارك عليكما وجمع بينكما بالخير ، ألف مبروك.

ارتفعت الزغاريد معلنة أنتهاء مراسم تتويج حب مريم وكريم فلقد كتب الكتاب ورفع الجواب.

بدأت التهاني في التساقط من كل حدب وصواب.

ضمتها والدتها بقوة: مبروك يا حبيبتي

والدة كريم: كفاية عليكي كدا يا أم محمد خليني أخدها في حضني أنا شوية.

سحبت الأم نفسها من أحضان ابنتها قائلة وهي تمسح دموعها: أصلها هتوحشني أوي

ربت كريم على كتفها قائلاً بحنان: هو أسبوع عسل وبعدين هنسكن قريب منك.

وضع باسل يده على كتف كريم: شكلك إديت الشغل زومبه يا كبير

كريم ضاحكاً: لا والله بس ...

رامي: ما كفاية يا عم باسل وقعت قلب الراجل ، يعني بدل ما تباركله تبشره إنه خسر شغله ؟

وقع قلب كريم في ساقيه ، ارتفع صوت شادي ضاحكاً: أديك أنت اللي وقعت قلبه

باسل مطمئناً: في شاليه أوضتين دا ليك وشاليه تاني 3 أوض دا لمامتك ولمامت مريم وكمان محمد لو حابب.

محمد: بس أنا شغلي هنا

باسل: وفي شغل كمان ف المنتجع شوف اللي يناسبك وهيبقى بتاعك

نظرت مريم إلى كريم: بس أنا مش هأقدر أسيب ديما

ديما بمرح: ليه ؟ ديما هياكلها العو مثلاً ؟ هههههه

أحاط مراد كتفي ديما بذراعه قائلاً: ديما دي بنتي حبيبتي وهتعيش معايا ، تونسني ف وحدتي.

ديما: شوفتي يعني من الأخر مش فاضيالك

مريم ضاحكة: بقى كدا ! ماشي ماشي

كريم: لو مريم مش حابه الفكرة خلاص أنا ممكن أسافر وأجيلها أخر كل أسبوع

هدى: مش حابه إزاي يعني؟

ماري: دا حتى هيبقى مايه وهوا نضيف

شريف ممازحاً: أيوه يا عم مين قدك هيبقى معاك الماء والخضرة والوجه الحسن

لكزته ماري بحدة: يعني أنت ناقصك حاجه ولا إيه ؟

شريف: لا لا لا مش قصدي ، بس مافيش هنا مايه ولا خضرة أما بالنسبة للوجه الحسن فمافيش أحسن من وشك يا حياتي

ماري: أه باحسب

ميرنا ضاحكة: يظهر إن ماري ربتلك الهسهس يا عم شريف

شريف: ههههههه الهسهس بس ؟ ، دا الهسهس والبوعبوع والذي منه

ماري بحنق: تقصد إيه ؟

قبل يدها قائلاً:قصدي كل خير

مريم: بجد يا ديما مش هأقدر أسيبك في الشركة لوحدك

ديما: لوحدي مين ؟؟ ما رنا وميرنا وماري كلهم معايا أهو.

مريم: بردو لم أطمن الأول إنه نعيم اتمسك

هدى: يعني حضرتك الحارس الشخصي اللي هتحميها؟

مريم: لا بس ع الأقل هأكون جنبها لو احتاجتني

كريم مقاطعاً أي اعتراض أخر: وأنا مع مريم ف رأيها ، لما أرجع اشتغل كل أسبوع هأجيلها

والدة كريم بحنق: وعليك من دا بإيه يا ابني ؟

همست ميرنا في أذن مريم: شكلها بدأت تتقمص دور الحما وعن جدارة ، خلي بالك من نفسك بقى يا أوختشي

باسل: كدا أحسن يا طنط وأهو يفرشوا الشاليه هناك على مهلهم وبذوقهم عقبال ما نمسك نعيم بيه

والدة كريم بإستسلام: اللي تشوفوه ، المهم راحتكوا

قبل كريم يدها: ربنا يخليكي ليا يا ست الكل

رامي: ما يلا بقى هتتأخروا على شهر العسل

شادي: دا على أساس إنه مستنيهم على محطة الإتوبيس

دفع رامي وجهه بكف يده: تصدق إن دمك عسلية

شادي مغيظاً إياه: طول عمري برنس

كريم ضاحكاً: لا أنا أمشي أحسن بدل ما تاكلوا دماغي

غمزه رامي: أه يا برنس أخوها خرج من هنا لفيته تحت جناحك وخليته يجوزهالك خلال شهر.

كريم باسماً: عقبالك

وجه رامي نظراته إلى ميرنا التي نظرت أرضاً في خجل.

امتلئ بالضيق فهي لن تكون له ، وأيضاً لا يستطيع تخيلها لغيره.

ودع العروسان الجميع منطلقين في رحلة أسبوع شهر العسل ، متجهين إلى بداية حياة مشتركة بما تحويه أيامها من سعادة وشقاء.

-------------

دخلت رنا إلى مكتبها ملقية السلام ، ما كادت تجلس حتى دلفت شيماء حاملة علبة كبيرة والإبتسامة تصل إلى أذنيها.

سميرة: صباح الخير ، إيه السعادة والإشراق دا كله ؟

شيماء بحبور: وما أبقاش سعيدة ليه ؟ ، دي حتى الدنيا بامبي بامبي بامبــــــي

عوني ضاحكاً: ما تهدي علينا شوية يا ست سعاد حسني

رنا باسمة: ربنا يزيدك ويرزقنا

سميرة: إنما إيه العلبة دي ؟

فتحت شيماء العلبة ومرت عليهم تدريجياً ليتناول كل واحد منهم قطعة: دي بمناسبة قراية فتحتي على عادل والخطوبة كمان أسبوع.

صرخت سميرة في سعادة: مبروووك والله صبرتي ونولتي يا بنت الإيه

عوني: مبروووك عقبال البكاري

ضمتها رنا: مبروك يا شوشو ربنا يتمم بخير.

عوني: أومال فين أستاذ عادل عشان نبارك له ؟

- أنا أهو يا عوني

ضمه إليه بقوة قائلاً بفرح: ألف ألف مبرووك

سميرة: مبروك يا أستاذ عادل

رنا باسمة: ربنا يتمم بخير

عادل بإبتسامة سعيدة: الله يبارك فيكوا ، عن إذنكوا هأروح أبشر المدير

عاد عوني إلى مكتبه بعد مغادرة عادل.

سميرة: ودا حصل إمتى ؟

شيماء: يوم الخميس قالي أوصلك رفضت فقالي أنا كدا كدا رايح شارعكوا وكمان عمارتكوا بصراحة اتكسفت وبعد إلحاح قبلت وف الأخر لاقيته طالع معايا نفس الدور وداخل قابل بابا وكلمه.

سميرة: أووووبا دا شكله وقع ولاحدش سمى عليه.

دفعت شيماء بقطعة الشيكولاته في فمها: كُلي وإنتي ساكتة بقى

خاطبت رنا قائلة: مش هتاكلي من الشيكولاته يا رنوش؟ دي حتى حلاوة خطوبتي

سميرة: لا لا أنا لازم أحضر الخطوبة الشيكولاته ما تنفعنيش

شيماء: الخطوبة والفرح كمان

بدأت رنا في تناول الشيكولاتة وما إن مضغتها قليلاً حتى أصابها الغثيان فركضت مسرعة إلى الحمام.

شيماء متعجبة: هي مالها ؟

عوني ساخراً: تلاقيكي جايبه شكولاته رخيصة

سميرة وهي تلوكها في فمها: بالعكس دي طعمها تحفة

عوني: إنتي هتفرق معاكي مثلاً؟ دي لو منتهية الصلاحية هتاكليها

نظرت شيماء إلى العلبة: بس الصلاحية تمام وكمان دي من أشهر محل وماركتها معروفة

سميرة: سيبك سيبك ، تلاقيها واخده دور برد ولا حاجه.

       عادت رنا وهي في حالة من الإعياء الشديد ، اتجهت إليها شيماء بقلق: مالك ؟

رنا مطمئنة: ما تشغليش بالك ما اتغطتش كويس إمبارح مش أكتر

شيماء: تحبي تروحي للدكتور؟

رنا: لا لا مافيش داعي

شيماء: اللي يريحك ، سلمتك

رنا بإبتسامة باهتة: الله يسلمك.

دخل عادل قائلاً بجدية: يا جماعة في حاجه مهمة ولازم نتفق عليها.

عوني ضاحكاً: أنت بتتحول ولا إيه ؟

خاطبه عادل بجدية: وقت الشغل شغل

تنحنح عوني بحرج: أسف

عادل بجدية: في شركة هتدخل شراكة معانا ، ودي شركة أجنبية مقرها ف برلين ، ألمانية يعني ، وقررت تبعت وفد هنا عشان يشوف الشركة وطريقة الإدارة وسير الأمور.

شيماء متعجبة: وهما مالهم ومال الشركة ماشية إزاي؟

عادل بنفس النبرة: هما الناس دي كدا بتقرر إذا كانت هتتعامل مع الشركة ولا لأ من خلال طريقة وإسلوب الإدارة وكمان معاملة الموظفين وإذا كان الموظفين مرتاحين في الشركة ولا لأ وهكذا ، لإنه لو الموظفين مرتاحين في الشغل هيدوا أكتر ودا اللي هما عاوزينه.

سميرة: طب والمطلوب ؟

عادل: المطلوب حد يبقى مرافق للناس دي في جوالتها ف القاهرة ودا هيبقى لمدة أسبوع شاملين يوم الجمعة كمان لإنهم هيسافروا السبت الصبح ، وكمان الجولات هتكون في الشركة واللي بيتعلق بيها زائد جولات سياحية ، مين شايف نفسه قد المهمة دي ؟

سميرة منسحبة: لا أنا ما أقدرش ، ما ينفعش أسيب الولاد طول اليوم وكمان شكلي مش واجهه للشركة نهائي.

رفع عوني يديه: وأنا ما أقدرش ، مراتي الحمل مجننها ولو اتأخرت فمتو ثانية بتقلب الدنيا ما بالك بوفد ألماني وإحتمال يبقى فيه مزز دي هتقلب بطلاقي.

شيماء: أنت عارف يا عادل أنا ما أنفعش ، خطوبتنا كمان أسبوع ويدوب ألحق ، أنا كدا إحتمال ما أحضرش الخطوبة أصلاً  ههههههههه

ثم أضافت بجدية: ولا أنت تنفع يا عادل ، بليز إحنا خطوبتنا يوم الجمعة أساساً.

توجهت النظرات إلى رنا فقالت بإستسلام: خلاص أنا موافقة بس ما تبصوليش كدا.

عادل باسماً: أنا مش عارف لولا إنك معانا كان حصل إيه

شيماء: أه والله ، كل ما نتزنق ما نلاقيش غيرها وهي مش بتتأخر.

رنا بتردد: بس اللي هيجي الشركة دا لوحده يعني ؟

عادل: مندوب من الشركة الألمانية

رنا: أيوه يعني أنا هأبقى معاه لوحدي ؟

عادل بحيرة: في شخصيات بتحب تاخد الزوجة معاها بس مش عارف دا هيحصل المرة دي ولا لأ

رنا: ما أنا مش هأقدر أكون لوحدي معاه

عادل معاتباً: دا على أساس إني هاسمح بكدا ؟

شيماء بحيرة: طب هنعمل إيه ؟

عادل مفكراً: أنا بأفكر حد يروح معاها ع الأقل أول مقابلة دي ولو طلع معاه مراته ولا حبيبته يبقى رنا اللي تكمل.

سميرة: بس أديك شايف ماحدش مننا فاضي

عادل: ممكن أخلي حد من الإستقبال ، ما أعتقدش إنه وراهم شغل كتير وكمان يبقوا واجهه للشركة.