(43)

 الظلام طغى على المكان كأنه وباء لم يترك للضوء ثغرة يتسلل عبرها. الظلام لا يحدث فقط عند غياب الشمس أو أي مصدر للضوء ولكنه يحدث أيضاً عند إختفاء الخير فيُخلف وراءه قلوب مظلمة عامرةً بالظلم.
الظلم والظلام كلمتان من نفس الأحرف وأيضاً نتيجتان لنفس الفعل ، فعل إختفاء الخير والخوف من الله فتسود القلوب ويسودها الظلم والجبروت ، لتأتي يوم الحشر معبرة عن سواد قلوب أصحابها بسواد وجوههم.يتخيل المجرم أن الظلام يخفي جريمته ، قد يكون هناك في ظنونه شئ من الصواب ولكن هذا في ... الدنيا ، لكن في الأخرة كيف سيكون المقياس ؟؟؟القناع الأسود سيخفي ملامحك عن العباد ولكن ما الذي يمنع رؤيتك عن رب العباد ؟؟؟تسلل عندما تأكد من أمان المكان أو هكذا خُيل إليه ، دخل عبر الشرفة كما فعل في المرة السابقة.ما إن دلف إلى الشقة حتى تحولت العتمة إلى أنوار كأن الأضواء تتسابق لتكشفه أمام العوام.فجأة خرج كل من مخبأه ليؤكد زيف حدسه ، فالمكان لم يكون فارغاً كما أعتقد ولكنه كان ملغماً برجال الشرطة.صرخ بها قائدهم وقد رفع السلاح بوجهه: سلم نفسك بالذوق وأوعى تفكر تهرب ، البوليس محاوط المكان ومراقبينك من ساعة ما دخلت المنطقةشعر بالغيظ والحنق الشديد فبعد سنوات من الإجرام يقبض عليه بهذه الطريقة ؟!--------------كان القلق أخذ به مأخذه عندما دق الباب فأسرع يفتحه.سألها بقلق: اتأخرتوا ليه ؟لم تجبه بل دفعته بعيداً وانطلقت إلى الحمام ، استغرب بشدة لتصرفها الغريب ، نظر إلى الطفلين وسألهما: هي مالها ؟
أجابها أمجد: أصلها شربت عصير لمون
علي باستغراب: ساقع ؟كرم: أيوه
علي: ودا من إيه دا ؟كرم ضاحكاً: كل ما جدو ونانا يكلموها تشرب لمون ، مش راضية تقتنع إنها لو خلصت اللمون اللي في مصر كله بردو مش هتخلصضحكوا جميعاً ، تنحنح علي محاولاً إخفاء ضحكته: بس يا كرم عيب كدا
كرم بلا مبالاة: مش اللي بأقوله صح ؟ ، جدو ونانا على طول كدا
علي مغيراً مجرى الحديث: أصلاً طول ما أنت بتقول نانا دي عمرك ما هتفلح ، اسمها تيته ، مش كفاية ساكت على مامي وبابي دولأمجد مبرراً: ما هي تيته بتزعل مننا لما بنقولها تيته عايزانا نقولها نانا
كرم: وأنا مش عايزها تقعدني قدامها ساعة تفضل تقولي إنه تيته دي كلمة عامية ومش حلوة لكن نانا دي حاجه كلاس
علي منفجراً في الضحك: هي وصلت لكلاس ؟؟ خلاص قولها نانا مادام هتبعد عن العامية وخليك في الكلاسأمجد: هأروح أشوف ماميعلي: انبسطوا ؟كرم: أه أوووي ، جدو ودانا الملاهي وكمان دخلنا سينماعلي: طب كويس
كرم: أنا هأروح أغير هدومي وأروح أشوف ماميقبله علي: ماشي ، تصبح على خير
اتجه علي إلى غرفته التي تشاركه فيها نادية ، جلس على الأريكة ومازال الضحك يتملكه.جلست نادية إلى جانبه وقد رفعت حاجبيها متسائلة: مالك مسخسخ كدا ليه ؟ ... صوت ضحكك سمعاه من وأنت برهعلي: أصل كرم قال كلمة ضحكتني
نادية: أها ، بس صحيح ما قولتليش وشك اتقلب ليه لما عرفت إنه حماك وحماتك جم وهما خرجوا معاهم ؟تنهد علي بقوة ونسي الضحك: خوفت ليقنعوا رنا إنها تسيبني وتاخد الولاد
نادية: ليه يعني؟إلتفت إليها بإستنكار: يعني مش عارفة ليه ؟ ، عشان اتجوزت عليها
- أها ، بس حماتك شكلها واخده بالها من نفسها أوي ، هي أه محجبة بس في نفس الوقت شيك ، كانت لابسة جيبة وتي شيرت بكُم ومع ذلك محافظة على شياكتها
- أه ، ما هي دكتورة بقى
- بجد ؟ ، دكتورة إيه ؟- نفسية
- يا شيخ !- وعمي كمان دكتور نفسي
- ههههههههه هما كلهم كدا ولا إيه ؟ ، مافيش غير المجال دا في عيلتهم يعني ؟أرجع ظهره إلى الوراء قائلاً: دي حكاية طويلةأسندت ساعدها فوق كتفه قائلة: إحكي يعني إحنا ورانا إيه ؟- بُصي يا ستي ، حمايا وحماتي دول إتجوزوا جواز عادي وتقليدي جداااا ، اللي هو جواز الصالونات زي ما بيقولوا بس كانوا متافهمين أوووي ، كانت ساعتها حماتي لسه بتدرس في السنة الخامسة وحمايا كان اتخرج وبيشتغل في مستشفى وما كانش لسه فتح عيادة ولا غيره ، المهم في خلال كام شهر إتجوزوا بس حبوا بعض بالعشره وبقى اللي يشوفهم يفتكر جوازهم كان عن حب يعني كانوا نموذج حلو لجواز الصالونات ، كانت حماتي اتفقت مع حمايا إنه مافيش خلفة لحد ما تتخرج وهو وافق ، وكمان سمحلها تكمل دراستها بعد ما أهلها قالولها لو رفض مش هتكملي ، بس هو كان مثقف ومتعلم فقبل ، واختارت مجال الطب النفسي بعد كدا مع إنها كانت بتتمنى إنها تبقى دكتورة جراحة ، المهم إنها اتخرجت وبدأوا فعلاً يفكروا في موضوع الحمل دا بس لظروف إلهيه فضلوا سنتين من غير أي إشارة للحمل وبعد ما بدأوا يفقدوا الأمل حماتي حملت في رنا وكانت طايرة بيها ، بس خلال جوازهم حمايا كان فتح عيادة خاصة بيه وكانت حماتي تقعد فيها الصبح لما يكون في المستشفى ويجي بقى هو بعد معاد شغله ، لكن هي سابت العيادة بعد حملها واتفرغت  لرنا وتربيتها وبس لحد ما دخلت رنا الكلية رجعت للعيادة مع جوزها تاني بس من حوالي سنة كدا حمايا قفل العيادة وساب المستشفى وقرر إنه يتقاعد.
- هو عنده كام سنة ؟
- يعني داخل عالستين
- يااااااااه ... دا أنا كنت فاكراه في الأربعينات
- ههههههههه هو حمايا كدا وكمان حماتي بيهتموا بصحتهم أوووي وشكلهم أكتر ، أكل صحي ، رياضة الصبح ، عشا خفيف كدا ... مش عارف رنا ما طلعتلهومش ليه
- وأنت إتجوزت رنا إزاي ؟
ضيق حدقتيه وسألها مترقباً: وإنتي عايزة تعرفي ليه ؟- عادي ، مش عايز تقول بلاش
- كان ليا صاحب من ثانوي مع رنا في الكلية وفمرة روحت اسلم عليه لمحت رنا وسألته عليها وكدا فقالي إنها بنت كويسة جداً ومحبوبة كمان ، حاولت أقرب منها صدتني ، أكلمها رفضت ، طلبت اتقدم قالتلي باب بيتنا مفتوح ، اتقدمت ووافقوا مبدئياً ، كلمتها كام مرة ولما حبيت إننا نتجوز أهلها رفضوا
- ليه ؟؟؟- وقتها ماكانش لسه عندي شقة ويا دوب لسه مبتدي أجمع قرشين ، ما يكفوش تمن شقة في الزمن دا
- وحصل إيه ؟- أبداً ، هي وقتها كانت فعلاً بدأت تحبني وبعد جوازنا قالتلي إنها حبتني من ساعة ما شافتني مع صاحبي أول مرة بس مش من أخلاقها الكلام دا ، وقفت في وش أهلها وقالت هاتجوزه وفعلاً إتجوزنا ، أنا مقدر تفكير أهلها وهما كانوا صح جداً  وافقوا عليا على أساس أجهز نفسي في فترة الخطوبة وخصوصاً إنها كانت موافقة عليا بس لما استعجلنا الجواز رفضوا ، مش معقول نتجوز وبعدين نجهز ، وبما إنها بنتهم الوحيدة فكانوا عايزين عالأقل حياة ينفع تعيش فيها حتى لو من غير رفاهية
- ومع ذلك إتجوزتوا ؟- أه ، رنا كانت شخصيتها قوية وكانت لما تبقى عايزة حاجه بتعملها فأصرت إننا نتجوز وقتها كنت عايش مع بابا –الله يرحمه- في الشقة دي بس طبعاً البيت ماكانش بالشكل دا ، دا عملناه بمرور الوقت وأغلبه كان بالقسط ، وبابا مات بعد جوازنا بشهر تقريباً ، وفضي البيت علينا.- وأهلها عملوا معاها إيه ؟- فضلوا مضايقين مننا فترة ، بس زي ما قولتلك بنتهم الوحيدة ومالهومش غيرها فرجعوا الوصال تاني خصوصاً بعد حملها.
- وما حاولوش يساعدكوا ؟؟
- حمايا وحماتي البيت اللي هما فيه دلوقتي مش شقة لا دي أرض ملك وهما بنوا عليها زي فيلا 4 أدوار ، أولى اتنين دول فتوحين على بعض وليهم باب خاص اللي هوا باين في الواجهه والدورين التانين ليهم باب تاني لوحدهما بس من ورا كانوا عاملينه عشان رنا لما تتجوز تقعد فيه لما تزورهم مثلاً أو حتى تعيش فيه
- طب ما كنتوا عيشتوا فيه من الأول
- لا ، أنا كان لازم أجيب شقة وأفرشها وتبقى باسمها عشان يبقى حقها مضمون ونبقى ننقل للشقة دي لو إحنا حبينا بعد كدا ، دا غير طبعاً إن ف رأيهم أول سنة جواز ع الأقل لازم الزوجين يعيشوا مستقلين بعيد عن أهل أي حد من الطرفين عشان يقدروا يحلوا مشاكلهم لوحدهم ويتفاهموا بشكل صحيح.- هههههههههههه كلام دكاتره يعني
- ههههه أه
- طب ودلوقتي ليه هي ما تروحش تقعد ف الشقة دي وأنا وأنت ف الشقة دي ؟أبعد ذراعها عن كتفه ونظر لها بغضب: دا بيت رنا قبل ما يكون بيتي ، دا غير إن عمري ما هأسيبها ولا أخليها تقعد في بيت أهلها.نادية مهدئة فقد تغلب عليه طابع الزوجة الثانية وبقوة: خلاص خلاص هدي نفسك ، أنا كنت بأهزر أصلاً.علي بضيق: ولا حتى هزار ،  الموضوع دا مافيهوش هزارأومأت نادية بضيق ، وقد امتلئ قلبها بالغيرة من وجود رنا في حياته ، متناسية أنها هي الدخيلة على حياتهم.