(28)

مريم: أنا مش عارفة أقولكوا إيه ، ماكانش في لزوم للتعب دا كله يا جماعة

شيماء: دي مامتنا كلنا زي ما هي مامتك بالظبط

سميرة: لا لا لا حرام عليكي يا شيخة دا أنا ف عمرها تبقى مامتي إزاي ؟!!

عوني: هههههههههههه أه والله دا إنتي شكلك أكبر منها أصلاً

والدة مريم: ههههههه حرام عليكوا ما بقتش قادرة أخد نفسي من كتر الضحك

عادل: ألف سلامة عليكي

رنا: بقى مامتك حلوة كدا ، وأنا أقول حلاوتك دي جيباها منين

هدى: أنا بأقول بردو مش باين عليها إنها مامته دي يا دوب أختها

والدة مريم: مش للدرجة دي

مريم: لا لا أبوس إيدك ما تعلقيش على كلامهم لأحسن يقولوا إنك أختي الصغيرة كمان 

ماري: ما دا شئ مفروغ منه أصلاً

شريف: أنا من رأيي إنك يا مريم تخلفيها كمان

هدى: ههههههههه لا لا كدا أوفر

سميرة: معلش بقى أنا لازم أمشي عشان الولاد لوحدهم ف البيت

شيماء: إستني أوصلك بعربيتي عشان ما تتأخريش أكتر من كدا

عوني: وأنا هأروح أشوف مراتي زمانها خلصت كشف هي وحماتي

عادل: هي مراتك بتكشف هنا ؟

عوني: أه الدكتور بتاعها هنا

رنا: مبروك البيبي اللي في الطريق

شيماء: تقوم بالسلامة

عوني: دا أنا اللي هأقوم بالسلامة مش هي

سميرة: هههههههههه للدرجة دي؟

عوني: الوحم دا طلع عيني أكتر ما هو مطلع عينها

والدة مريم: ههههههه معلش يا ابني ، أومال عايز تبقى أب من غير ما تتعب ؟

عوني: يلا الحمدلله ، هأروح بقى لأحسن دي روحها ف مناخيرها وهتبهدلني لو اتأخرت 

سميرة: مش يلا بينا يا شيماء ولا إيه ؟

شيماء: أوكيه يلا

مريم: اتفضلوا

رنا: وأنا كمان معلش مضطرة أمشي عشان الولاد زمانهم رجعوا من المدرسة ، والله غير كدا كنت قعدت معاكوا

والدة مريم: طبعاً يا بنتي ولادك أولى ، روحي إنتي شوفيهم وبعدين أنا مش لوحدي

مريم: روحي يا رنا وسلميلي عليهم وبوسيهملي كتيرررر

رنا: ههههههههه حاضر من عنيا ، حمدالله ع السلامة يا طنط ، عن إذنكوا

والدة مريم: الله يسلمك ، مع السلامة

وقفت أمام باب المستشفى بإنتظار سيارة أجرة ، سمعت رنين هاتفها المحمول فأخرجته من حقيبتها لتجد رقم المنزل يطلبها أجابت بلهفة: السلام عليكم

-أيوه يا ماما

-أمجد؟ ... في حاجه يا حبيبي؟

-لا ، إحنا جينا من شوية وإنتي اتأخرتي أووي

-معلش يا حبيبي كنت بأزور مريم

-طب تعالي بسرعة بقى عشان إحنا جعانين ومافيش حد ف البيت خالص

-طيب ماشي مسافة السكة إن شاء الله وأكون عندك

-طاااايب

-بلاش تدخولوا المطبخ وتلعبوا ف حاجه أنا مش هاتأخر

-حاضر يا ماما ، بس كرم ممكن ما يسمعش الكلام

-قوله إنه لو عمل حاجه مافيش خروج يوم الجمعة !

-حاضر هأقوله ، باي

-اسمها سلام عليكم أو سلام لو تعباك أوي وحاسسها كبيرة

-أوووف ماشي ، سلام

-وعليكم السلام

أعادت الهاتف إلى مكانه في حقيبتها ، وقفت ما يقرب من العشر دقائق دون جدوى فقررت السير لأقرب شارع رئيسي أو حتى تجد سيارة أجرة أو حتى أتوبيس.

لاحظت سيارة تتوقف أمامها بخطوات وترجل منها عادل.

سألها: ما لاقتيش تاكسي؟

أجابته بيأس: لا مش لاقيه

-تحبي أوصلك ؟

-لا معلش مش هينفع

عاد رنين هاتفها يرتفع فأجابت: السلام عليكم

-يا ماما ، كرم عايز يقلي بيض !

صاحت بفزع: إيــــــــــــــــــه ؟ ، أمجد قوله يخرج م المطبخ دلوقتي بدل ما أجي وأكسر عضمه !!!

أخذ كرم الهاتف من أخيه: أنا جعان يا ماما

-قولت جاية !!! ، وبعدين من إمتى الجوع دا ؟ ، ما أنا باتحايل عليك كل يوم تاكل وتقولي شبعان

-دا كل يوم بس إنهارده أنا جعان

-والله يا كرم لو دخلت المطبخ وحاولت تفتح النار أو تعمل حاجه فيه ، هأضربك ضرب ما أخدوش حمار ف مطلع ومافيش مصروف شهر قدام وكمان مافيش خروج ليك يوم الجمعة

-أوووووووووف بقى ، طيب بس تعالي بسرعة

-ماشي ، اشرب عصير موز باللبن أهو عندك ف باب التلاجة ، أكتر من كدا لا يا كرم

-طاااااااااايب

أغلقت الخط بعصبية ، سألها عادل محاولاً ألا يضحك: هتستني تاكسي أو حاجه تركبيها بردو ولا هتيجي أوصلك ؟

هزت كتفيها بمعنى أنه ليس باليد حيلة ، فتح لها الباب قائلاً: اركبي بقى عشان نلحق نوصل قبل ما يجوعوا أكتر ويأكلوا البيت باللي فيه

ركبت ضاحكة: ربنا يستررررررر

أوصلها أسفل البناية التي تسكنها وإلتفت إليها: يا رب تكوني لحقتيهم

-ياااا رب ، شكراً ع التوصيلة

-العفو ، دا أقل واجب

-ميرسي ، عن إذنك

-مع السلامة

فتحت باب السيارة وهمت بالترجل عندما شعرت بيد تقبض على ذراعها بقوة وتسحبها من السيارة بعنف ، نظرت إلى من يفعل بها ذلك لتجده علي.

عادل: أهلاً يا أستاذ علي إزي حضرتك ؟

علي بغضب مكتوم: الحمدلله ، أنت شكلك مبسوط مش محتاج سؤال

عادل: الحمدلله

علي لرنا: قدامي على فوق ، عن إذنك يا ... أستاذ عادل

ظل علي ممسكاً بذراعها حتى وصلوا الشقة ونادية تلحق بهم صامتة ، دلفوا إلى الشقة وأتى الطفلان يركضان بسرعة.

أمجد: ماما أخيراً جيتي

كرم: يلا يا ماما أنا عايز أكل

رنا: حاضر هأعمـ....

قاطعها علي بقوة: نادية حضري الغدا للولاد وأقعدي معاهم وهما بيذاكروا عقبال ما أخلص كلامي مع الست رنا ومش عايز حد يزعجنا !

أومأت نادية بصمت شاعرة بالسعادة داخلية فقد يتطور الأمر إلى أن يتطاول بيده عليها فتطلب الطلاق وتتخلص منها ، ولم يتجرأ أي من الطفلين على الإعتراض وسارت رنا برفقته صامتة بإنتظار حديثه.

أدخلها غرفتها ، رأت الغضب الشديد على ملامحه تنذر بعاصفة هوجاء مما أشعرها بالخوف.

اقترب منها وهو يقول: إيه اللي خلاكي تركبي معاه العربية لوحدك؟

-والله ما كنت عايزة أركب معاه بس ما كانش في حاجه أركبها وأنا متأخرة على الولاد وخوفت يعملوا حاجه ولا يأذوا نفسهم

سألها بصوت هادر: وإنتي إيه اللي أخرك لحد دلوقتي أصلاً يا هانم

تراجعت بخوف: وطي صوتك الولاد هيسمعوا

أخفض صوته مكرراً السؤال وهو يكز على أسنانه: كنتي فين ؟

-روحت لمريم المستشفى عشان مامتها تعبانة

-ومن إمتى مريم هانم عندها أم ؟ ... من ساعة ما عرفتيها وهي عايشة مع ديما ! ، مامتها فجأة ظهرت كدا ؟

سألتها مصدومة: أنت بتكدبني وبتشك فيا يا علي ؟

أمسكها من ذراعها بعنف وقال غاضباً: ما إنتي اللي بتقولي كلام ما يدخلش الدماغ ، ومُصره إنك تأكدي إن في حاجه بينك وبينه

سحبت ذراعها من يده بعد عناء وقالت بثقة غاضبة: والله عايز تشك فيا فشك ، أصلاً أنا لو عايزة عادل اللي مجننك دا ما أنا كنت اطلقت وروحت أتجوزته إيه يمنعني؟

-أنا مش هأطلقك

هزت كتفيه بلا مبالاة: قضايا الخلع مش بتاخد وقت الأيام دي

سألها مصدوماً: وإنتي عايزة تخلعيني؟ للدرجة دي!

-أنا بأقولك لو عايزة ، مش هأحتاج لف ودوران هأعمل اللي أنا عايزاه

-لا دا أنا لو سيبتك ليه تبقي بتحلمي !

اتجه إلى الباب فأعتقدت أنه سيغادر ولكن على العكس أغلق الباب من الداخل بالمفتاح من ثم سحبه ووضعه في جيبه واقترب منها ببطء ، ظلت تتراجع مع كل خطوة يقترب فيها إليها حتى إصطدمت بالحائط خلفها ، جذبها إليه بعنف متأملاً نظرت الفزع في عينيها ، ضمها بقوة وبدأ بتقبيلها بعنف ، حاولت مقاومته ولكنها لم تفلح.

بعد أن استكانت بين ذراعيه ابتعد عنها وهو يتلمس وجهها بحنان ، فتحت عينيها المغمضتين لتقابلها نظراته المليئة بالحب.

همس في أذنها: إنتي بتاعتي أنا وبس

نظر في عينيها وتابع: حبيبتي أنا ومش هتكوني حبيبة حد غيري ، بحبك

غرقت في عالم أخر ملئ بالحب والسعادة متناسية زواجه بأخرى وجرحه لها ، ونسيانه هذا الحب عندما جرحها بتفضيله لأخرى عليها ، فهي تحب حقاً ولن تحب غيره مهما فعل بها.