(30)

- ألو

- أيوه يا باشا

- إنهارده اللي إحنا إتفقنا عليه يتنفذ مفهوم ؟

- بسرعة كدا يا باشا ؟

- أه دا الوقت المناسب

- بس دا شغل كبير وخطير أوي يا باشا

- ما تقلقش ، هأبسطك

- هههههه طول عمرك فاهمني

- أومال إيه ، بس تعمل اللي إتفقنا عليه بالحرف الواحد

- عيب يا باشا ، هي دي أول مرة يعني؟ ، هههههههههه ، وإن شاء الله مش هتكون الأخيرة كمان

- ماشي ياخويا لما نشوف شاطرتك

- ماشي ، يلا هأسيبك أنا بقى عشان أشوف شغلي وأجهز

------------

وقفت ديما وميرنا برفقة مراد يتمازحون سوياً.

مراد مازحاً: إنتي كل صحابك حلوين كدا ؟ ، لا أنا ما أقدرش ع الكلام دا

ميرنا ضاحكة: دا أنت اللي حلو يا أنكل مش حد تاني

مراد: هههههههه إنتي بتعاكسيني كدا عادي قدام صاحبتك ؟ ، وإنتي ساكته لها يا ديما ، مين يجي يدافع عني دلوقتي ؟

إنضم رامي لهم وشعر بالغيرة تأكل قلبه بسبب ضحك ميرنا ومزاحها مع مراد الذي بالأصل بمثابة أب له.

رامي: أنا موجود

مراد: شوفت البنت الخلبوصه دي ، بدل ما أكسفها أنا هي اللي كسفتني

شادي منضماً إليهم: مين دي اللي كسفتك يا عمو ؟

مراد: ميرنا

شادي: وتلاقيك مبسوط إن واحدة حلوة زي ميرنا كسفتك

مراد: هههههههه طبعاً

رامي بغيرة: ما تلم شباكك يا عم شادي ، أنت مش بتعتق خالص؟

همس له شادي: هي دي تبع بيسو بردو ولا إيه ؟

تمتم من بين أسنانه مجيباً: لا تبعي أنا يا فالح

شادي محاولاً كتم ضحكاته: طب خلاص معلش ماكنتش أعرف

نظر له بقوة وهمس: وأديك عرفت ، لما نشوف هتعمل إيه

مراد مستفسراً: بتتوشوشوا تقولوا إيه منك ليه ؟

شادي: لا أبداً دا رامي بيحذرني أجي جنب الحاجه بتاعته

مراد مستفهماً: حاجة إيه؟

رامي: ما تشغلش بالك أنت يا عمو

ديما: إنتي كلمتي مريم من ساعة ما جينا ؟

ميرنا: لا لسه

ديما: طب شوفيها واطمني على مامتها عشان ما تفتكرش إننا نسيناها

ميرنا: مريم عمرها ما هتفكر كدا ، ع العموم هأكلمها وأطمن

ديما: طيب

ميرنا: عن إذنكوا

شادي: إتفضلي

مراد: حمدالله على سلامة مامت صاحبتك

ديما: الله يسلمك يا بابا

ابتعدت ميرنا لتدق على مريم وتطمئن عليها هي و والدتها ، أجابتها مريم قبل أن تغلق الخط: أيوه

-كل دا عشان تردي ع الموبايل ؟ نايمة على ودانك ؟

-هههههههههههه يا بنتي بطلي طولت لسان ، قولي سلامو عليكو الأول

-وعليكم السلام يا ستي ، مامتك عامله إيه دلوقتي؟

-الحمدلله كويسة ، سيبتها نايمة في المستشفى

-ليه ؟ وإنتي فين دلوقتي؟

-روحت يا ستي ، ماما فضلت ورايا عشان أروح

-يعني هتباتي لوحدك ف البيت إنهارده ؟

-أه هأعمل إيه؟ ، ما ديما معاكي

-مش كنتي مخططة تقعدي مع مامتك؟

-كنت ، بس الست الوالدة فضلت ورايا لحد ما حلفت عليا أروح ، وبصراحة أحسن حاجه لإني كنت هأموت وأخد شاور وأنام في سريري

- ههههههههههههه أه يا واطية وإنتي أما بتصدقي طبعاً

- طبعاً يا بنتي ، لا بجد عايزة أوضب أوضة ماما قبل ما أجيبها الصبح من المستشفى فقولت أريح دلوقتي ولما أصلي الفجر أوضبها بقى

- وإنتي بتعملي إيه دلوقتي؟

- أخدت شاور ولسه لابسه البيجاما وهادخل السرير عشان أنام لاقيت اللي بتتصل تزعجني

- تصدقي إنك معفنة وأنا غلطانة إني سألت فيكي

- بعض مما عندكم يا ست ميـ.....

- مالك يا بت إتخرستي ليه؟

همست لها مريم بصوت بالكاد سمعته: هشش ، إستني

سألتها ميرنا بقلق: في إيه؟

أجابتها مريم بنفس النبرة: مش عارفة ، سمعت صوت كركبه بره وخارجه أشوف في إيه

-طب خلي بالك ليكون الشباك مفتوح وحبة هوا وقعوا حاجه

لم تكد تنهي جملتها حتى سمعت صراخ مريم في الطرف الأخر: ميرررنــــــــاااااااااااااااااااااااااااااا

وانقطع الخط ...

-------------

تملمت رنا في فراشها قليلاً قبل أن تفتح عينيها لتصطدم بجسد علي الراقدة بين أحضانه ، تذكرت عندما أخبرها بحبه لها فارتسمت إبتسامة سعيدة على شفتيها ، ظلت تتأمله لفترة حتى استقيظ ورسم إبتسامة سعيدة على شفتيه عندما رأها تتطلع إليه بحب.

علي: بتبصيلي كدا ليه ؟

أجابته بنفس الإبتسامة: وحشتني

ضمها إليه بقوة: وإنتي أكتر ، مش هأبعد عنك تاني أبداً

نظرت له بشك: بجد ؟

قبل أن ينطق بحرف سمعوا طرقات على الباب ، نقلت نظرها بينه وبين الباب قائلة مستفهمة: مش هتفتح ؟

نهض من مكان على مضض وإرتدى بنطاله وأخرج منه المفتاح ، اتجه إلى الباب ليفتحه ، وجد أمامه نادية تنظر إليه بأعين ضيقة فسألها بملل: يا نعم؟ هو أنا مش قولت مش عايز إزعاج؟

نادية وهي تبحث عن رنا بعينيها: أنا حبيت أطمنك إنه الولاد خلصوا الواجب واتعشوا وناموا

أجابها: طب كويس ، في حاجه تانية؟

لمحتها نادية وتقوم بضم الغطاء إلى جسدها لتخفيه فإلتفتت إلى علي وهتفت بضيق: بقى حضرتك عملتني بيبي سيتر لولادك عشان تقضي وقت مع الهانم ؟

أمسك ذراعها بعنف وصاح بغضب: إنتي إزاي بتتكلمي كدا ؟ ما تنسيش يا هانم إنها مراتي زي ما إنتي مراتي !

نادية متوجعة: سيب إيدي ، أنت جاي تتشطر عليا أنا وسايبها على حل شعرها تركب العربية مع واحد غريب؟

علي بغيظ: دي حاجه ما تخصكيش ، خليكي في حالك وبس !

شعرت بغضبه يزداد تجاهها بينما أموره تنصلح مع غيرها فقررت أن تغير من إسلوبها.

تحولت نبرتها إلى الدلال وبدأت تداعب خصلات شعره قائلة: أنا بأغير عليك يا لولي حتى لو كانت مراتك بردو ، أنا زعلانة منك عشان أنت وحش

اقتربت منه لتلتصق به وهمست في أذنه: دا أنا حتى كنت محضرالك قميص النوم اللي بتحبه يا لولي

إبتلع علي ريقه بصعوبة ودخل إلى الغرفة ليجمع أشياءه بصمت وغادر مع نادية تاركاً رنا تحملق فيه بصدمة ، أليس هذا من كان يدعي شوقه إليها منذ لحظات ؟ ، تركها وانصرف بمجرد أن نادته تلك الـ نادية ! دون أن ينظر لها أو يلقي عليها كلمة واحدة!

أمسكت بالوسادة التي كان يضع رأسه عليها وقذفتها بإتجاه الباب بقوة وقالت بغضب: مش هتلمسني تاني يا سي علي ، كفاية عليك لولي

انخرطت في البكاء حتى تملكها التعب ، نهضت لتغتسل وتتوضأ ، اطمئنت على أطفالها وأنهم ينعمون بنوم هادئ وعادت لغرفتها تصلي وتتقرب إلى الله وتقرأ أياته لتهبط على قلبها بالهدوء والسكينة وراحة البال " ألا بذكر الله تطمئن القلوب ".

-------------
إنفض الحفلة وذهب كلٌ إلى سريره وبقى الشركاء والمسئولون يتبادلون الحديث بينما يقوم العمال بتنظيف المكان وإعادته كما كان.

مراد: بس بجد كانت سهرة حلوة أوي

شادي: تسلم إيدك يا كريم ، فعلاً تنظيم رائع

كريم: دا شغلي يا شادي

لبنى حانقة: وأنا فين ؟ ... هو كريم بس اللي عمل كل دا ؟

ضحك مراد: معلش وإنتي كمان برافو عليكي

رامي: المهم إنه إحنا إنبسطنا

ديما: الحمدلله

بوسي بضيق: وإنتي هتمشي إمتى يا ديما ؟

نظر لها مراد بحنق: والله هي ليها هنا زي ما ليكي بالظبط إن ما كانش أكتر ف تقعد ولا تمشي ما يخصكيش

بوسي بمسكنة: والله ما قصدي حاجه وحشة يا عمو

ديما: خلاص يا بابا ما فيش حاجه ، أنا ماشية الصبح يا بوسي

باسل بحزن: مش تقعدي شوية ؟ ، إنتي ما لحقتيش

شادي: والله حاولت معاها يا باسل كتير بس هي مُصره

باسل مغتاظاً: وأنت داخلك إيه ؟

شادي ببراءة: مش شريكتي يا بيسو ؟

رامي: ما خلاص أنت وهو مش قصة يعني ، تروحي وتيجي بالسلامة يا ديما

ديما: الله يسلمك يا رامي

لبنى: هو حضرتك هتيجي تاني ؟

ديما: كل فترة إن شاء الله عشان أتابع واتأكد إنه كله ماشي تمام

بوسي ساخرة: هترقبينا يعني ؟

رامي محذراً: شغلها وفلوسها يا بوسي

نظر لديما متابعاً بإبتسامة هادئة: تنوري في أي وقت يا ديما

جاءت ميرنا راكضة والخوف واضح على ملامحها ، أمسكت ذراع ديما بقوة باكية.

ديما بفزع: في إيه يا ميرنا ؟ حصل إيه ؟

ميرنا بصوت متقطع: مــ .... مريم

ظهر الخوف على وجه كريم فأسرع يسألها: مالها مريم ؟

نظرت له لبنى متمعنة لردة فعله ، تابعت ميرنا: كنت بأكلمها وفجأة قالت إنها سامعة صوت كركبه بره وخارجة تشوفها

سألتها ديما: هي مش ف المستشفى مع مامتها ؟

هزت رأسها نفياً: لا مامتها أصرت إنها تروح فروحت

مراد قلقاً: طب كملي

زاد بكاءها وهي تضيف: فجأة سمعتها بتصرخ والخط قطع

وضعت ديما يدها على فمها لتمنع نفسها من الصرخ ، ضغطت ميرنا على ذراع ديما بقوة وأردفت: إحنا لازم نروح نشوف إيه اللي حصلها !

ديما: أكيد ، يلا نروحلها

شادي: بس أنتوا عقبال ما تروحوا هيكون اللي حصل حصل

باسل: الطريق طويل والدنيا ليل ولو فعلاً في حاجه مش هتلحقوها شادي معاه حق ، دا غير اللي ممكن يحصلكوا لو روحتوا لوحدكوا

ميرنا بقوة: مش مهم ، المهم نكون معاها

كريم: أنا هأوصلهم

لبنى بضيق: وأنت مالك ومالها ؟

أجابها بغضب: مش وقته الكلام دا ، دي محتاجة مساعدة

باسل: وأنا هأجي معاكوا

أمسكته بوسي بقوة وقالت: لا أنت هتقعد هنا ومش رايح في حته

سحب ذراعه منها وقال متحدياً: والله مش على أخر الزمن حد يمشي كلامه على باسل مراد يا بوسي هانم

استدار لكريم قائلاً: جهز العربية الجيب ويلا عشان هنسافر فوراً

ديما: مافيش داعي تتعبوا نفسكوا معانا إحنا هنتصرف

باسل منهياً الحديث: وأنا مش هأسيبكوا تسافروا ف ساعة زي دي لوحدكوا وخصوصاً بعد اللي سمعته

بوسي بحزن مصطنع: هتسيبني لوحدي يا باسل؟

رامي: خليك أنت يا باسل وأنا اللي هأروح

باسل بإصرار: قولت أنا اللي هأروح يعني أنا اللي هأروح

مراد صارماً: روحوا أنتوا الإتنين العربية الجيب تاخدكوا كلكوا وأنا الصبح هأحصلكوا ، هأفضل أنا وشادي

ثم أضاف مجبراً: وبوسي ... عشان الضيوف اللي بايتين هنا ما يحسوش بحاجه

وافقه الجميع وانطلقوا ليستعدوا ، أوفق رامي ميرنا قبل أن تصعد إلى السيارة قائلاً: كلمي ماري وشريف خليهم يروحوا يشفوها عقبال ما إحنا نوصل

أومأت موافقة ، لاحظ الدموع التي أسالت كحلها فأضفت عليها حزناً فوق حزنها ، أردف بحنان: ما تقلقيش كل حاجه هتبقى كويسة

نظرت له صامتة للحظات قبل أن تسمع كريم يصرخ: يلا أركبوا بقى

صعدوا إلى السيارة وشعرت ميرنا بالأمان وبعض الإطمئنان بسبب كلماته بالرغم من أنها كلمات عادية تقال في كل المناسبات وبلا معنى ، لم تؤثر بها قبلاً ولكن منه هو أصبحت تحمل كل معاني الأمان في الدنيا.

ميرنا: أنا هأتصل بماري وشريف يروحولها

أسرعت ديما بإخراج هاتفها هي الأخرى: صح ، إزاي تاهت عن بالي الفكرة دي ، وأنا هأكلم رنا تاخد علي وتحصلهم

ميرنا بتفكير: تفتكري أقول لهدى كمان ولا إيه ؟

ديما: لا ، مامتها مش هترضى ولا بابها كمان إنتي مش شايفة الساعة كام؟ ، وكمان في خطر

إنقبض قلبيهما وتبادلتا النظرات الفزعة لذكر كلمة "خطر" وتابعوا ما كانوا يفعلونه.

-------------

تقلب بضيق ثم مدت يده ليهز زوجته الراقدة بجواره وهو يقول متأففاً: قومي يا ماري... قومي

دفعت يده بعيداً عنها وقالت بضيق: سيبني يا شريف عايزة أنام في إيه ؟

شريف بحنق: إقفلي الزفت التليفون بتاعك دا بقاله ساعة بيرن وصحاني

ماري بنعاس: سيبه يرن سيبه

شريف: يوووووه إنتي مش فالحة غير في الأكل والنوم بس؟

نهض من مكانه ليحضر الهاتف الذي تركته ماري على طاولة الزينة ، وجد المتصل ليس إلا ميرنا فشعر بالقلق.

عاد إلى زوجته وقال بجدية وهو يحاول جعلها تفيق: قومي يا ماري ردي ، دي ميرنا اللي بتتصل ، خايف يكون حصل معاها حاجه

تناولت منه الهاتف ولكن كان رنينه إنقطع فنظرت إليه متسائلة: بس ميرنا سافرت إنهارده مع ديما ومش هترجع غير بكره

هز كتفيه بحيرة: مش عارف بقـ...

عاد الرنين من جديد قبل أن ينهي جملته ، أجابت ماري بلهفة: أيوه يا ميرنا في إيه ؟

انصتت ماري حتى أنهت ميرنا حديثها فقالت بقلق: طيب طيب ، أنا هاروح لها دلوقتي وهابقى اطمنكوا ، باي

نظر لها شريف بترقب ، نهضت وأمسكته من ذراعه قائلة بعجلة: يلا قوم إلبس عقبال ما ألبس عشان نروح لمريم

-مريم؟ ... ليه ؟

أخرجت له ملابسه وتناولت ثيابها قائلة بعجلة: هأبقى أقولك في السكة ، البس بس دلوقتي

--------------

مدت يدها من تحت الغطاء لتلتقط الهاتف وأجابت بصوت ناعس: السلام عليكم

بعد لحظات أنتفضت في سريرها وابعدت الغطاء بسرعة وهي تغلق الهاتف قائلة: خلاص خلاص أنا هأروحلها دلوقتي يلا سلام

بدلت ملابسها على عجل وقبل أن تخرج من باب الشقة تذكرت زوجها وأنها يجب أن تخبره بخروجها فهذا زوجها بالنهاية ، اتجهت لباب غرفته التي يشاركها مع نادية وعندما همت بدق الباب سمعت ضحكات نادية المكتومة وغزل علي بها فشعرت بيد تقبض على قلبها تعصره بقوة وامتلئت نفسها بالغيرة ، استدارت لتغادر ولكنها قالت بصوت هامس "أعوذ بالله من الشيطان الرجيم ، أنا هأقوله واعمل اللي عليا ويبقى يرجعلها تاني" ، دقت الباب بقوة أكبر مما أرادت سمعت نادية تقول من الداخل متأففة: اللهم طولك يا روح هو الواحد ما يعرفش يستريح ف البيت دا

تذكرت عندما طرقت عليها الباب قبل عدة ساعات لتتلصص عليها فابتسمت ساخرة ففعلاً " يا فلان ، افعل ما تشاء ، فالدنيا كما تدين تُدان " حتى في أتفه الأمور.

فتح علي الباب بضيق قائلاً: خير في إيه ؟

توقف مبهوتاً قبل أن يسألها وهو يضيق عينيه: إنتي لابسه ليه؟

أجابته بضيق: أنا خارجة

سألها محاولاً ألا يظهر عليه الغضب: على فين العزم إن شاء الله ؟

أجابته بجدية: رايحة لمريم ... عن إذنك

همت بالإنصراف لكنه أمسك ذراعها بقسوة: وتروحيلها ليه ف ساعة زي دي؟

روت له ما أخبرتها به ديما في الهاتف قبل قليل وأنهت روايتها بقولها: وأنا هأروح عشان أطمن عليها

علي مفكراً: طب ما ماري وشريف رايحين يبقوا يطمنوكي مش لازم تروحي يعني

نزعت ذراعها غاضبة وهي تصيح به بحده: أنت إيه يا أخي ؟؟؟ هو البعيد ما بيحسش؟  ... بأقولك لوحدها في البيت وصرخت وتليفونها مقفووول ... مافيش دم ولا نخوه خالص كدا ؟

أوشك علي أن يصفعها ولكنه قبض يده قبل أن تمسها بسوء وقال وهو يكز على أسنانه: إستني هنا ، هأغير وأجيلك.